О квоте иммиграции оралманов на 2004 год Күшін жойған

Оралмандардың 2004 жылға арналған көшіп келу квотасы туралы "Оралмандардың 2004 жылға арналған көшіп келу квотасы туралы" Қазақстан Республикасы Президентінің 2003 жылғы 31 қазандағы N 1216 Жарлығының 2 тармағын және "Қазақстан Республикасы Президентінің 2003 жылғы 31 қазандағы N 1216 Жарлығын іске асыру туралы" Қазақстан Республикасы Үкіметінің 2003 жылғы 29 қарашадағы N 1207 қаулысының 2 тармағын іске асыру мақсатында, "Қазақстан Республикасындағы жергілікті мемлекеттік басқару туралы" Қазақстан  Республикасының 2001 жылғы 23 қаңтардағы N 148-ІІ Заңының 27-бабының 1-тармағының 8), 14), 15), 17)-тармақшаларына және 2-тармағына сәйкес Шығыс Қазақстан облысының әкімияты ҚАУЛЫ ЕТЕДІ:

1. 2004 жылдың көшіп келу квотасына енгізілген 470 оралмандар отбасы облыс аумағына қабылдансын.

2. Көші-қон және демография басқармасына:

1) көшіп келген оралмандарды облыс үшін белгіленген көшіп келу квотасы шеңберінде қабылдауды және жайластыруды ұйымдастыру;

2) оралмандарды облыстық қалалары мен аудандары бойынша орналастыру;

3) оралмандарға біржолғы жәрдемақы төлеуге, көлік шығыстарын өтеуге және тұрғын үйлер алуға республикалық бюджеттен бөлінген қаржыларды мақсатты пайдалануды қамтамасыз ету;

4) осы қаулының орындалу қорытындылары және облыстағы көші-қон үрдістерін реттеуді жетілдіру жөніндегі ұсыныстар туралы облыс әкімінің аппаратына 2005 жылғы 15 қаңтарға дейін ақпарат беру ұсынылсын.

3. Еңбек, жұмыспен қамту және халықты әлеуметтік қорғау басқармасы:

1) облыс аумағына тұрақты тұруға келген оралмандарды әлеуметтік қамтамасыз ету мәселелерін, оның ішінде зейнетақылар мен жәрдемақылар тағайындауды Қазақстан Республикасының заңнамасына сәйкес шешсін;

2) оралмандар отбасыларының еңбекке қабілетті мүшелерін олардың біліктілігі мен мамандығына сәйкес жұмыспен қамту жөніндегі шараларды қабылдасын.

4. Денсаулық сақтау басқармасы:

1) облысқа келген оралмандарды ақысыз дәрігерлік тексеруден өткізуді;

2) оралмандарға дәрігерлік қызмет көрсетудің кепілді көлемін қамтамасыз етсін.

5. Білім департаменті: Мектеп жасындағы оралман балаларды жалпы білім беретін мектептерде оқумен толық қамтамасыз етсін.

6. Ішкі істер бас басқармасына:

1) келген оралмандарды уақтылы тіркеуді және Республиканың аумағы бойынша тұруы мен жүріп-тұруына арналған құжаттарды уақытында ресімдеу;

2) қолданыстағы заңнамаға сәйкес Қазақстан Республикасының  азаматтығын қабылдауға тілек білдірген оралмандардың қажетті құжаттарын ресімдеуді ұйымдастыру ұсынылсын.

7. Қала мен аудан әкімдері:

1) оралмандарды қабылдауды, жайластыруды және оларға қажетті әлеуметтік-тұрмыстық жағдайлар жасауды қамтамасыз етсін;

2) тұрғын үйлер құрылысын және шаруашылық жүргізу үшін белгіленген тәртіппен оларға жер учаскелерін бөлсін;

3) Білім департаментімен бірлесіп қазіргі кездегі қазақ әліпбиін және орыс тілін оқып-үйренуге тілек білдірген оралмандар үшін жалпы білім беретін мектептердің базасында ақысыз курстар ұйымдастырсын;

4) Қазақстан Республикасының заңнамасына сәйкес оралмандарға өз кәсібін ұйымдастыруға, ұлттық кәсіптерді жаңғыртуға, шаруа қожалықтарын ұйымдастыру үшін шағын кредиттер бөлуге жәрдемдессін.

8. Осы қаулының орындалуына бақылау жасау облыс әкімінің орынбасары Д.М. Селихановқа жүктелсін.

9. Осы қаулы әділет органдарында тіркелген күнінен бастап күшіне енеді.