Об утверждении Перечня гарантированного объема бесплатной медицинской помощи на 2005 год Қолданыста

Тегiн медициналық көмектiң кепiлдi көлемiнiң 2005 жылға арналған тiзбесiн бекiту туралы "Қазақстан Республикасында азаматтардың денсаулығын сақтау туралы" Қазақстан Республикасының 1997 жылғы 19 мамырдағы Заңына , "Қазақстан Республикасының денсаулық сақтау iсiн реформалау мен дамытудың 2005-2010 жылдарға арналған мемлекеттiк бағдарламасын iске асыру жөнiндегi iс-шаралар жоспарын бекiту туралы" Қазақстан Республикасы Yкiметінiң 2004 жылғы 13 қазандағы N 1050 қаулысына сәйкес Қазақстан Республикасының Үкiметi ҚАУЛЫ ЕТЕДI:

1. Қоса беріліп отырған Тегін медициналық көмектiң кепiлдi көлемiнiң 2005 жылға арналған тiзбесi бекiтiлсiн.

2. Қазақстан Республикасы Денсаулық сақтау министрлігі облыстардың, Астана және Алматы қалаларының әкімдерi Қазақстан Республикасының азаматтарына тегiн медициналық көмектiң кепiлдi көлемiн ұсынуды қамтамасыз етсiн.

3. Осы қаулы 2005 жылғы 1 қаңтардан бастап күшіне енедi және жариялануға тиiс.

Қазақстан Республикасы Үкiметiнiң 2004 жылғы 21 желтоқсандағы N 1348 қаулысымен бекiтілген Тегiн медициналық көмектiң кепiлдi көлемiнiң 2005 жылға арналған тiзбесi

1. Жалпы ережелер

1. Тегін медициналық көмектiң кепiлдi көлемiнің тiзбесi (бұдан әрi - TMККК тiзбесi) Қазақстан Республикасының азаматтарына және оралмандарға (бұдан әрi - азаматтар) мемлекеттiк бюджет қаражаты есебiнен ұсынылатын медициналық көмек көрсетудің түрлерiн, көлемдерi мен шарттарын айқындайды және мейлiнше дәлелдi тиiмділігі бар медициналық қызметтердi қамтиды.

2. Шетелдiктер мен азаматтығы жоқ адамдарға ұсынылатын TMККК тiзбесi шұғыл айғақтар бойынша, сондай-ақ егер Қазақстан Республикасы бекiткен халықаралық шарттарда өзгеше көзделмесе, айналадағылар үшiн қауiп төндiретін аурулар кезiнде медициналық көмек көрсетудi қамтиды.

3. TMККК тiзбесiне кiрмейтiн медициналық көмекке:

1) халықтың жеке қаражаты;

2) жұмыс берушiнiң қаражаты;

3) ерiктi медициналық сақтандыру жүйесi;

4) Қазақстан Республикасының заңнамасымен тыйым салынбаған басқа да көздер есебiнен ақы төленедi.

4. TMККК азаматтарға жедел медициналық көмек, санитарлық авиация, амбулаториялық-емханалық, стационарлық және стационарды алмастыратын медициналық көмек нысандарында көрсетiледi.

2. Жедел медициналық көмек және санитарлық авиация нысанында ұсынылатын ТМККК тiзбесi

5. Жедел медициналық көмек пен санитарлық авиация нысанында көрсетілетiн медициналық көмек дәрi-дәрмекпен қамтамасыз етудi қоса алғанда, жiтi аурулардан, созылмалы аурулардың өршуiнен, жазатайым оқиғалардан, жарақаттардан және уланудан, сондай-ақ жүктiлiк пен босанудан туындаған адам өмiрiне немесе денсаулығына қауiп төндiретiн жағдайларда (шұғыл жағдайда) халықтың барлық санаттары үшiн тегiн жүзеге асырылады.

6. Жедел медициналық көмек нысанындағы ТМККК тiзбесi емдiк-диагностикалық манипуляцияларды орындауды және науқастарды медициналық айғақтары бойынша шұғыл медициналық көмек көрсететін ұйымдарға жеткiзудi қамтиды.

7. Жедел медициналық көмек нысанындағы TMККК тiзбесiне шұғыл ауруханаға жатқызуды қажет етпейтiн науқастарды, жүктi әйелдердi жоспарлы емдеу мен жоспарлы тасымалдау, сондай-ақ амбулаториялық-емханалық ұйымдар дәрiгерлерiнiң тағайындауларын орындау, сот-наркологиялық және медициналық сараптаманың басқа түрлерiн жүзеге асыру, еңбекке жарамсыздық парақтары мен қорытындыларды беру кiрмейдi.

3. Амбулаториялық-емханалық көмек нысанында ұсынылатын ТМККК тiзбесi

8. Амбулаториялық-емханалық көмек нысанындағы ТМККК азаматтарға амбулаториялық-емханалық көмек көрсететін денсаулық сақтау ұйымдарында бастапқы медициналық-санитарлық, бiлiктi және мамандандырылған медициналық көмек түрiнде, оның iшiнде стационарды алмастыратын көмек нысанында ұсынылады.

9. Бастапқы медициналық-санитарлық көмектi (бұдан әрi - БМСК) азаматтардың тiркелген жерi бойынша денсаулық сақтау саласындағы уәкiлеттi орган (бұдан әрi - уәкiлеттi орган) белгiлеген тәртiппен терапевтер, педиатрлар, жалпы практика дәрiгерлерi, акушер-гинекологтар, фельдшерлер, акушерлер, медбикелер (бұдан әрi - БМСК мамандары) көрсетедi. Бiлiктi медициналық көмекті жоғары медициналық білімдi БМСК мамандары көрсетедi.

10. Мамандандырылған медициналық көмектi БМСК маманының жолдамасы бойынша бейiндiк мамандар көрсетедi.

11. Амбулаториялық-емханалық көмек нысанындағы TMККК тiзбесi уәкiлеттi орган бекiткен диагностика мен емдеудiң стандарттарына (мерзiмдiк хаттамаларға) бұдан әрi - Хаттамалар 1 ) сәйкес алдын алу, диагностикалық және емдеу қызметтерiн қамтиды. _____________________________ 1 Бұл жерде және бұдан әрі Хаттама болмаған кезде диагностикалық және емдеу іс-шараларының көлемі жалпыға бірдей қабылданған көзқарастарға сәйкес медициналық айғақтар бойынша айқындалады.

12. Алдын алу қызметтерi мыналарды қамтиды:

1) уәкiлетті орган белгiлеген тәртiппен 20 мен 34 жас аралығындағы әйелдердi, декреттелген жастағы балаларды және халықтың жекелеген топтарын алдын ала тексеру;

2) Қазақстан Республикасының Үкiметi бекiтетiн тiзбеге сәйкес жұқпалы және паразиттік ауруларға қарсы егу;

3) санитарлық-гигиеналық, iндетке қарсы iс-шаралар мен аурулардың алдын алу, оның iшiнде: жұқпалардың ошақтары мен сыртқы ортаның қолайсыз факторларын эпидемиологиялық және санитарлық-гигиеналық тексеру, сондай-ақ оларды жою немесе әсерлерiн азайту жөнiндегi шаралар; халықты және шаруашылық субъектілерiн санитарлық-эпидемиологиялық ахуалдар мен аумақтың санитарлық-эпидемиологиялық мониторингінің нәтижелерi туралы хабардар ету;

4) халықты қауiпсiз сумен қамтамасыз ету және ұтымды тамақтану жөнiндегі түсiндiру жұмысы;

5) негiзгi аурулар кезiнде қатердің іс-қимыл факторларының алдын алуды қоса алғанда, салауатты өмiр салтын қалыптастыру жөнiндегi іс-шаралар;

6) отбасын жоспарлау мен ұрпақты болу денсаулығын сақтау жөнiндегi түсiндiру жұмысы.

13. Диагностикалық қызметтер мыналарды қамтиды:

1) осы Тiзбенiң 11-тармағының 1) тармақшасында көрсетiлген халық топтарын алдын ала тексеру кезiнде: БМСК маманының жолдамасы бойынша БМСК маманының, стоматологтың, акушер-гинекологтың, хирургтың, офтальмологтың, сондай-ақ басқа да бейін мамандарының тексеруi; зертханалық зерттеулер: қанның жалпы талдауы (лейкоциттердiң, гемоглобиннің санын, эритроциттердiң шөгу жылдамдығын анықтау), зәрдiң жалпы талдауы, копрограмма қандағы және зәрдегi глюкозаны анықтау, қандағы аспарагинді және аланинді аминотрансфераздарды, несеп нәрiн анықтау, қақырық талдауы, мерезге микрореакция, әйелдердiң қынап жалындысы мен онкоцитологияға арналған жағынды, уретральды жағынды - айғақтары бойынша; аспаптық зерттеулер: 40-тан асқан адамдарға электрокардиография, флюорография;

2) ауруы бойынша есепте тұрған азаматтарды диспансерлеу кезiнде: БМСК маманының және/немесе бейiн маманының тексеруi; уәкілеттi орган белгілеген тәртiппен зертханалық және аспаптық зерттеулер;

3) ауруы бойынша қаралған кезде: БМСК маманының тексеруi; БМСК маманының жолдамасы бойынша бейiн маманының тексеруi; БМСК маманы мен бейiн мамандарының жолдамасы бойынша азаматтардың барлық санаттарына медициналық айғақтар бойынша полимеразды тiзбектi реакция негiзiндегі диагностиканы, иммундық-феномендiк типтеуді, компьютерлiк томографияны, магниттік-резонанстық томографияны, ангиографияны, медициналық-генетикалық зерттеулерді (бұдан әрі - қымбат тұратын зерттеулер) қоспағанда, зертханалық және аспаптық зерттеулер; БМСК маманы мен бейін мамандарының жолдамасы бойынша 18 жасқа дейiнгi балаларға, жүктi әйелдерге, Ұлы Отан соғысына қатысушыларға, мүгедектерге, "Алтын алқа", "Күмiс алқа" белгiлерiмен марапатталған көп балалы аналарға, атаулы әлеуметтiк көмек алушыларға, жасына қарай зейнеткерлерге (бұдан әрі - халықтың әлеуметтiк қорғалмаған топтарына) жұқпалы аурулармен, сондай-ақ Қазақстан Республикасының Үкiметi бекiткен әлеуметтік елеулі аурулармен және айналадағыларға қауiп төндiретiн аурулармен (бұдан әрі - әлеуметтік елеулi аурулар) ауыратын науқастарға медициналық айғақтар бойынша қымбат тұратын зерттеулер.

14. Емдеу қызметтері мыналарды қамтиды:

1) емделуші қиын жағдайдан шыққанға және/немесе жедел жәрдем бригадасы келгенге дейiн шұғыл көмек көрсету;

2) емдiк манипуляциялар: инъекциялар, дәке, қатайтатын таңғыштар, шендеуiштер салу, медицина ұйымының шығыс материалдарын пайдалана отырып, хирургиялық, гинекологиялық, урологиялық, офтальмологиялық, оториноларингологиялық және басқа да амбулаториялық ем-шаралар;

3) 18 жасқа дейiнгi балаларға медициналық айғақтары бойынша физиоем-шаралар;

4) халықтың әлеуметтік қорғалмаған топтарына шұғыл стоматологиялық көмек, сондай-ақ тіс жұлуды, бұрғылауды және химиялық қатайтылған композицияланған материалдардан пломбылар салуды қоса алғанда 18 жасқа дейiнгi балаларға және жүктi әйелдерге көрсетілетiн жоспарлы стоматологиялық (ортодонтикалық және ортопедиялық көмектен басқа) көмек;

5) темiр тапшылығы анемиясының және йод тапшылығының алдын алуға арналған препараттармен жүктi әйелдердi, 5 жасқа дейiнгi балаларды, сондай-ақ уәкілетті орган бекiткен аурулар түрлерiнiң тiзбесi бойынша азаматтардың жекелеген санаттарын тегiн/жеңiлдiктi дәрi-дәрмекпен қамтамасыз ету.

4. Стационарлық көмек нысанында көрсетiлетiн ТМККК тiзбесi

15. Стационарлық көмек түрiндегі ТМККК денсаулық сақтауды мемлекеттiк басқарудың жергiлiктi органдарының ұсынуы бойынша облыстар, Астана және Алматы қалалары үшiн уәкілеттi орган белгiлеген емдеуге жатқызу жағдайларының жоспарланған санының (шектi көлемiнiң) шеңберiнде көрсетіледi.

16. Стационарлық көмек нысанындағы TMККК жоспарлы және шұғыл айғақтар бойынша көрсетiледi.

17. Жоспарлы айғақтар бойынша ТМККК БМСК маманының, емделушiнi басқа медициналық ұйымға ауыстыру кезiнде стационарлық көмек көрсететiн медицина ұйымының, сондай-ақ уәкілеттi орган белгілейтін тәртiппен құрылатын жоғары мамандандырылған медициналық көмек жөнiндегi комиссиялардың жолдамасы бойынша көрсетіледi. Шұғыл айғақтар бойынша TMККК жолдаманың бар-жоқтығына қарамастан көрсетiледi.

18. Стационарлық көмек нысанындағы ТМККК азаматтарға уәкiлеттi органмен немесе денсаулық сақтауды мемлекеттiк басқарудың жергiлiктi органдарымен, сондай-ақ медициналық мекемелермен тиiсті шарттары бар денсаулық сақтау ұйымы бiлiктi, мамандандырылған және жоғары мамандандырылған медициналық көмек түрінде, оның iшiнде хаттамаларға сәйкес стационарды алмастыратын көмек нысанында ұсынады.

19. Білікті медициналық көмек терапиялық, хирургиялық, педиатриялық және акушерлік-гинекологиялық бейiндер бойынша көрсетіледi.

20. Мамандандырылған медициналық көмек мынадай мамандықтар бойынша көрсетіледі:

1) аллергология, гастроэнтерология, гематология, дерматовенерология (кең көлемде зақымданған аурулардың ауыр рефрактерлi нысандары), иммунология, жұқпалы аурулар, кардиология, кардиоревматология, лепрология, наркология, неврология, нефрология, профпатология, психиатрия, пульмонология, реабилитология (реабилитология емдеудің ажырамас бөлiгi болып табылған жағдайда), ревматология, терапия, фтизиатрия, эндокринология кiретiн терапиялық бейін;

2) андрология, анестезиология және реаниматология, камбустиология, маммология, нейрохирургия, онкология, оториноларингология, офтальмология, проктология, травматология мен ортопедия, жүрек-қан тамырлары хирургиясы, трансплантология, токсикология, урология, хирургия, жақ-бет сүйегi хирургиясы кiретiн хирургиялық бейін;

3) балалар аллергологиясы, балалар гастроэнтерологиясы, балалар мен жасөспірімдер гинекологиясы, балалар гематологиясы, балалар дерматовенерологиясы, балалар жұқпалы аурулары, балалар иммунологиясы, балалар камбустиологиясы, балалар кардиоревматологиясы, неонатология, балалар неврологиясы, балалар нейрохирургиясы, балалар нефрологиясы, жасөспірімдер наркологиясы, балалар оториноларингологиясы, балалар онкологиясы, балалар офтальмологиясы, педиатрия, балалар психиатриясы, балалар пульмонологиясы, балалар анестезиологиясы мен реаниматологиясы, балалар реабилитологиясы (оңалту емдеудiң ажырамас бөлiгi болып табылған жағдайда), балалар жүрек-қан тамырлары хирургиясы, балалар стоматологиясы, балалар травматологиясы мен ортопедиясы, балалар трансплантологиясы, балалар токсикологиясы, жасөспiрiмдер терапиясы, балалар урологиясы, фтизиопедиатриясы, балалар хирургиясы, балалар жақ-бет сүйегi хирургиясы, балалар эндокринологиясы кiретiн педиатриялық бейiн;

4) денеден тыс ұрықтандыру мен медициналық генетикадан басқа акушерлік пен гинекологияны қамтитын акушерлік және гинекология бейіні.

21. Жоғары мамандандырылған медициналық көмек уәкілетті орган бекiтетiн тiзбе бойынша көрсетiледi.

22. Стационарлық көмек нысанында көрсетiлетiн ТМККК диагностикалық және емдiк қызметтерді қамтиды.

23. Диагностикалық қызметтер мыналарды қамтиды:

1) мамандардың тексерулері, консультациялары;

2) азаматтардың барлық санаттарына жоспарлы ауруханаға жатқызу, сондай-ақ қымбат тұратындарды қоспағанда, медициналық айғақтары бойынша зертханалық және аспаптық зерттеулер;

3) халықтың әлеуметтік қорғалмаған топтарына және әлеуметтiк елеулi аурулармен ауыратындарға медициналық айғақтары бойынша қымбат тұратын зерттеулер.

24. Емдеу қызметтерi мыналарды қамтиды:

1) медициналық айғақтары бойынша емдiк манипуляциялар;

2) уәкiлетті орган бекiтетін негізгі өмiрлiк маңызы бар дәрілiк заттардың тiзiмi шегінде медициналық айғақтары бойынша дәрi-дәрмекпен қамтамасыз eтуі;

3) медициналық айғақтары бойынша қан препараттарымен және компоненттерiмен қамтамасыз ету;

4) емдiк тамақтандыру.

25. Стационарлық көмек нысанындағы TMККК-нi көрсету стандартты палаталарда қосымша сервистiк қызметтердi (теледидар, телефон, тапсырыспен тамақтану және т.б.) ұсынусыз, мынадай шарттар сақталған кезде жүзеге асырылады:

1) емдеуге жатқызуға (жоспарлы емдеуге жатқызу кезiнде) жолдаманың болуы;

2) жоспарлы емдеуге жатқызу кезiнде жеке басты куәландыратын құжаттың немесе оны алмастыратын құжаттың болуы;

3) медициналық айғақтардың (тәулiк бойы медициналық бақылаудың қажеттілiгi) болуы;

4) жоспарлы емдеуге жатқызу кезiнде талап етілетiн тексерулердiң болуы.

5. Стационарды алмастыратын көмек нысанында ұсынылатын ТМККК тiзбесi

26. Стационарды алмастыратын көмек нысанындағы TMККК уәкiлеттi орган белгiлейтiн тәртiппен күндiзгі стационарларда, күндiз емделу палаталары мен үйдегi стационарларда ұсынылады.

27. Күндiзгi стационарларда және күндiз емделу палаталарында ұсынылатын стационарды алмастыратын көмек диагностикалық, емдiк iс-шараларды, оның iшiнде медициналық айғақтары бойынша уәкілеттi орган белгілейтiн негiзгi өмiрлiк маңызы бар дәрілiк заттардың тiзiмi шегiнде дәрi-дәрмекпен қамтамасыз етудi қамтиды.

28. Үйдегi стационарларда ұсынылатын стационарды алмастыратын көмек медициналық айғақтары бойынша емдiк манипуляцияларды жүргізудi және осы Тiзбенiң 14-тармағының 5-тармақшасында көзделген көлемде дәрi-дәрмекпен қамтамасыз етудi қамтиды.