О внесении изменений в постановление акимата Атырауской области от 27 декабря 2016 года № 307 «О некоторых вопросах Управления архитектуры и градостроительства Атырауской области» Күшін жойған

Атырау облысы әкімдігінің 2016 жылғы 27 желтоқсандағы № 307 «Атырау облысы Сәулет және қала құрылысы басқармасының кейбір мәселелері туралы» қаулысына өзгерістер енгізу туралы Атырау облысы әкімдігі ҚАУЛЫ ЕТЕДІ:

1. Атырау облысы әкімдігінің 2016 жылғы 27 желтоқсандағы № 307 «Атырау облысы Сәулет және қала құрылысы басқармасының кейбір мәселелері туралы» қаулысына келесі өзгерістер енгізілсін: 1) 2-тармақ келесі редакцияда мазмұндалсын: «2. Атырау облысы Сәулет және қала құрылысы басқармасының құрылымы: 1) басшы; 2) қала құрылысы жобаларын әзірлеуді ұйымдастыру бөлімі; 3) қала құрылысы жобаларын іске асыруды қамтамасыз ету бөлімі; 4) бас маман – есепші.»; 2) қосымшада: көрсетілген қаулымен бекітілген «Атырау облысы Сәулет және қала құрылысы басқармасы» мемлекеттік мекемесі туралы ереже осы қаулының қосымшасына сәйкес жаңа редакцияда мазмұндалсын.

2. «Атырау облысы Сәулет және қала құрылысы басқармасы» мемлекеттік мекемесі заңнамада белгіленген тәртіппен осы қаулыдан туындайтын барлық шараларды қабылдасын.

3. Осы қаулының орындалуын бақылау Атырау облысы әкімінің орынбасары Қ.Ә.Бекеновке жүктелсін.

4. Осы қаулы қол қойылған күнінен бастап күшіне енеді және ол алғашқы жарияланған күннен бастап қолданысқа енгізіледі.

Атырау облысы әкімдігінің 2022 жылғы 26 мамырдағы № 123 қаулысына қосымша Атырау облысы әкімдігінің 2016 жылғы 27 желтоқсандағы № 307 қаулысымен бекітілген «Атырау облысы Сәулет және қала құрылысы басқармасы» мемлекеттік мекемесі туралы ереже

1-тарау. Жалпы ережелер

1. «Атырау облысы Сәулет және қала құрылысы басқармасы» мемлекеттік мекемесі (бұдан әрі - Басқарма) Атырау облысының аумағында сәулет-қала құрылысы қызметі саласындағы басшылықты жүзеге асыратын Қазақстан Республикасының мемлекеттік органы болып табылады.

2. Басқарманың ведомстволары жоқ.

3. Басқарма өз қызметін Қазақстан Республикасының Конституциясына және заңдарына, Қазақстан Республикасы Президенті мен Үкіметінің актілеріне, өзге де нормативтік құқықтық актілерге, сондай-ақ осы Ережеге сәйкес жүзеге асырады.

4. Басқарма мемлекеттік мекеменің ұйымдық-құқықтық нысанындағы заңды тұлға болып табылады, оның рәміздері мен айырым белгілері (бар болса), Қазақстан Республикасының Мемлекеттік Елтаңбасы бейнеленген мөрлері және атауы қазақ және орыс тілдерінде жазылған мөртабандары, белгіленген үлгідегі бланкілері, Қазақстан Республикасының заңнамасына сәйкес қазынашылық органдарында шоттары бар.

5. Басқарма азаматтық-құқықтық қатынастарды өз атынан жасайды.

6. Басқарма Қазақстан Республикасының заңнамасына сәйкес уәкілеттік берілген жағдайда ол мемлекеттің атынан азаматтық-құқықтық қатынастардың тарапы болуға құқығы бар.

7. Басқарма өз құзыретінің мәселелері бойынша заңнамада белгіленген тәртіппен Басқарма басшысының бұйрықтарымен және Қазақстан Республикасының заңнамасында көзделген басқа да актілермен ресімделетін шешімдерді қабылдайды.

8. Басқарманың құрылымы мен штат санының лимиті Қазақстан Республикасының заңнамасына сәйкес бекітіледі.

9. Заңды тұлғаның орналасқан жері: Қазақстан Республикасы, Атырау облысы, Атырау қаласы, Әйтеке би көшесі 77, индексі 060010.

10. Осы ереже Басқарманың құрылтай құжаты болып табылады.

11. Басқарманың қызметін қаржыландыру Қазақстан Республикасының заңнамасына сәйкес жергілікті бюджеттен жүзеге асырылады.

12. Басқармаға кәсіпкерлік субъектілерімен Басқарманың өкілеттіктері болып табылатын міндеттерді орындау тұрғысынан шарттық қарым-қатынас жасауға тыйым салынады. Егер Басқарма заңнамалық актілермен кіріс әкелетін қызметті жүзеге асыру құқығы берілсе, онда алынған кіріс, егер Қазақстан Республикасының заңнамасында өзгеше белгіленбесе, мемлекеттік бюджетке жіберіледі.

2-тарау. Басқарманың мақсаттары мен өкілеттіктері

13. Мақсаты: Атырау облысы аумағында сәулет және қала құрылысы саласының белсенділігін іске асыру, елді мекендер мен қонысаралық аумақтарды орнықты дамуын, халқының толыққанды тіршілік ету ортасы мен тіршілік қызметін қалыптастыру.

14. Өкілеттіктері:

1) құқықтары: тиісті Атырау қаласы мен аудандар әкімдері аппараттарынан, мемлекеттік органдар мен кәсіпорындардан ақпарат сұрату; белгіленген тәртіппен Басқарманың құзыретіне жататын мәселелер бойынша басқада атқарушы мемлекеттік органдармен, ұйымдармен, меншіктің барлық нысандарындағы мекемелермен өзара іс-қимыл жасау; Қазақстан Республикасының заңнамалық актілерінде белгіленген өкілеттіктер шегінде сәулет және қала құрылыс қызметі саласындағы өзге де құқықтарды жүзеге асыру.

2) міндеттері: сәулет және қала құрылысы саласында мемлекеттік саясатты іске асыру; Басқарманың құзыретіне жататын мәселелер бойынша жеке және заңды тұлғалардың арыздарын, шағымдарын уақытылы қарауды қамтамасыз ету;

15. Функциялары:

1) облыс аумағындағы елді мекендердің белгіленген тәртіппен бас жоспармен бекітілген, аумақтарда қала құрылыстық жобалардың кешенді сызбасын (облыстың аудандық жоспарлау жобасын немесе оның бөлігін) іске асыру жөніндегі қызметті үйлестіру;

2) халқының есептік саны жүз мың тұрғыннан асатын облыстық маңызы бар қаланың бас жоспарының жобасын кейіннен Қазақстан Республикасы Үкіметінің бекітуіне ұсыну үшін облыстық мәслихаттың қарауына әзірлеу;

3) облыстық мәслихат мақұлдаған, халқының есептік саны жүз мың тұрғыннан асатын облыстық маңызы бар қалалардың бас жоспарларын әзірлеуді ұйымдастыру және оларды Қазақстан Республикасы Үкіметіне бекітуге ұсыну;

4) ведомстволық бағыныстағы әкімшілік-аумақтық бірліктердің (аудандық жоспарлаудың жобаларын) аумақтардағы қала құрылысы жоспарлауының кешенді сызбаларын, сондай-ақ қалалық мәслихат мақұлдаған халқының есептік саны жүз мыңға дейінгі, облыстық маңызы бар қалалардың даму бас жоспарының жобаларын облыстық мәслихаттың бекітуіне ұсыну бойынша жұмыстарды ұйымдастыру;

5) облыстық мәслихатқа, Қазақстан Республикасының заңдарына сәйкес қарамағындағы әкімшілік-аумақтық бірліктердің шекараларын белгілеу немесе өзгерту жөнінде, қала құрылысынан туындайтын факторларға байланысты ұсыныстар әзірлеуді және енгізуді ұйымдастыру;

6) облыстық маңызы бар қалалар бас жоспарларының жобаларына келісім беру;

7) аумақта жоспарланып отырған құрылыс салу не өзге де қала құрылысының өзгерістері туралы халыққа хабарлап отыру;

8) елді мекендердің бекітілген бас жоспарларын (қала құрылысын жоспарлаудың кешенді сызбаларын, жоспарлау жобаларын) дамыту үшін әзірленетін қала құрылысы жоспарларын (егжей-тегжейлі жоспарлау жобаларын, құрылыс жобаларын) бекітуді ұйымдастыру және іске асыру;

9) «Мекенжай тіркелімі» ақпараттық жүйесін жүргізуді және толықтыруды қамтамасыз етеді;

10) мемлекеттік қала құрылысы кадастрының дерекқорына енгізу үшін белгіленген тәртіппен ақпараттар мен мәліметтер беру;

11) Қазақстан Республикасының өндіріс күштерін орналастыру сызбасына сәйкес облыстың аудандық жоспарлау сызбасын, облыс орталығының, әкімшілік аудандарды салудың бас жоспарларын облыстық мәслихатқа қарауға ұсынады; аудан орталықтарын, облыстық маңызы бар қаланы салудың бас жоспарларын әзiрлейдi және оларды облыстық мәслихатқа бекiтуіне ұсынады.

3-тарау. Басқарманың бірінші басшысының мәртебесі, өкілеттіктері

16. Басқарманы басқаруды бірінші басшы жүзеге асырады, ол Басқармаға жүктелген міндеттердің орындалуына және оның өз өкілеттіктерін жүзеге асыруына дербес жауапты болады.

17. Басқарманың бірінші басшысы Қазақстан Республикасының заңнамасына сәйкес лауазымға тағайындалады және лауазымынан босатылады.

18. Басқарманың бірінші басшысының өкілеттіктері:

1) Басқарманың қызметіне басшылық етеді және оған жүктелген тапсырмалардың орындалуын қамтамасыз етеді;

2) Басқармада сыбайлас жемқорлыққа қарсы іс-қимыл жасауға бағытталған шараларды қабылдайды және сыбайлас жемқорлыққа қарсы шараларды қабылдағаны үшін дербес жауапты болады;

3) Басқарманың атынан сенімхатсыз іс-әрекет етеді, сотта, мемлекеттік органдар мен басқа да ұйымдарда оның мүдделерін білдіреді;

4) Қазақстан Республикасының заңнамасына сәйкес Басқарманың қызметкерлерін жұмысқа тағайындайды және жұмыстан босатады;

5) заңнамада белгіленген тәртіппен Басқарма қызметкерлерін көтермелейді және оларға тәртіптік жаза қолданады;

6) өз құзыреті шегінде бұйрықтар шығарады және Басқарма жөніндегі актілерге қол қояды;

7) Басқарманың құрылымдық бөлімшелері туралы ережелерді бекітеді;

8) қолданыстағы заңнамаға сәйкес өз құзыреті шегінде өзге де өкілеттіктерді жүзеге асырады. Басқарманың бірінші басшысы болмаған кезеңде оның өкілеттіктерін қолданыстағы заңнамаға сәйкес оны алмастыратын тұлға жүзеге асырады.

4-тарау. Басқарманың мүлкі

19. Басқарманың заңнамада көзделген жағдайларда жедел басқару құқығында оқшауланған мүлкі болуы мүмкін. Басқарманың мүлкі оған меншік иесі берген мүлік, сондай-ақ өз қызметі нәтижесінде сатып алынған мүлік (ақшалай кірістерді қоса алғанда) және Қазақстан Республикасының заңнамасында тыйым салынбаған өзге де көздер есебінен қалыптастырылады.

20. Басқармаға бекітілген мүлік коммуналдық меншікке жатады.

21. Егер заңнамада өзгеше көзделмесе, Басқарма өзіне бекітілген мүлікті және қаржыландыру жоспары бойынша өзіне берілген қаражат есебінен сатып алынған мүлікті өз бетімен иеліктен шығаруға немесе оған өзгедей тәсілмен билік етуге құқығы жоқ.

5-тарау. Басқарманы қайта ұйымдастыру және тарату

22. Басқарманы қайта ұйымдастыру және тарату Қазақстан Республикасының заңнамасына сәйкес жүзеге асырылады.