О доплатах к пособиям и стипендиям, выплачиваемым безработным Күшін жойған

Жұмыссыздарға төленетiн жәрдемақы мен стипендияға қосымша төлем туралы 📌 Ескерту. Күші жойылды - ҚР Үкіметінің 09.02.2005 № 124 қаулысымен.

1. Жұмыссыздарды әлеуметтiк қолдауды күшейту мақсатында және Халықаралық Қайта құру және Даму Банкiнiң займын беру шарттарына сәйкес Қазақстан Республикасының Министрлер Кабинетi ҚАУЛЫ ЕТЕДI: "Халықты жұмыспен қамту туралы" Қазақ Советтiк Социалистiк Республикасының Заңына белгiленген тәртiппен өзгертулер мен толықтырулар енгiзiлгенге дейiн жұмыссыздарға төленетiн жәрдемақы мен стипендияға қосымша төлем мынадай деңгейде белгiленсiн:

а) кәсiпорындардың, мекемелердiң және ұйымдардың қайта құрылуына немесе қызметкерлер санының (штаттың) қысқаруына байланысты жұмыстан босаған адамдарға - заңмен белгiленген есептiк көрсеткiштiң алты есе мөлшерiнде;

б) жұмыссыздардың басқа санаттарына - есептiк көрсеткiштiң үш есе мөлшерiнде. Бұл қосымша төлемдер жәрдемақы (стипендия) мөлшерi "а" және "б" тармақшаларында көрсетiлгендегiмен бiрдей немесе одан асатын жұмыссыздарға төленбейдi. 📌 Ескерту. 1-тармаққа өзгерiстер енгiзiлдi - ҚР Үкіметінiң 1996.08.09. N 987 қаулысымен.

2. Жұмыссыздарға төленетiн жәрдемақы мен стипендияға қосымша төлем Жұмыспен қамтуға жәрдемдесудiң мемлекеттiк қорының қаржысы есебiнен жасалсын.

3. Бұл қаулы 1995 жылдың 1 қыркүйегiнен күшiне енедi.