Об утверждении Правил определения экономического эффекта от бюджетных субсидий Күшін жойған

Бюджеттік субсидиялардың экономикалық әсерін айқындау қағидаларын бекіту туралы Қазақстан Республикасы Бюджет кодексінің 67-бабы 6-тармағының 1-1) тармақшасына сәйкес БҰЙЫРАМЫН:

1. Қоса беріліп отырған Бюджеттік субсидиялардың экономикалық әсерін айқындау қағидалары бекітілсін.

2. Қазақстан Республикасы Экология, геология және табиғи ресурстар министрлігінің Балық шаруашылығы комитеті заңнамада белгіленген тәртіппен:

1) осы бұйрықтың Қазақстан Республикасы Әділет министрлігінде мемлекеттік тіркелуін;

2) осы бұйрық ресми жарияланғаннан кейін оның Қазақстан Республикасы Экология, геология және табиғи ресурстар министрлігінің интернет-ресурсында орналастырылуын;

3) осы бұйрық мемлекеттік тіркелгеннен кейін он жұмыс күн ішінде Қазақстан Республикасы Экология, геология және табиғи ресурстар министрлігінің Заң қызметі департаментіне осы тармақтың 1) және 2) тармақшаларында көзделген іс-шаралардың орындалуы туралы мәліметтердің ұсынылуын қамтамасыз етсін.

3. Осы бұйрықтың орындалуын бақылау жетекшілік ететін Қазақстан Республикасының Экология, геология және табиғи ресурстар вице-министріне жүктелсін.

4. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі. «КЕЛІСІЛДІ» Қазақстан Республикасы Қаржы министрлігі

Қазақстан Республикасы Экология, геология және табиғи ресурстар министрі 2022 жылғы 26 тамыздағы № 586 Бұйрығымен бекітілген Бюджеттік субсидиялардың экономикалық әсерін айқындау қағидалары

1-тарау. Жалпы ережелер

1. Осы Бюджеттік субсидиялардың экономикалық әсерін айқындау қағидалары (бұдан әрі – Қағидалар) Қазақстан Республикасы Бюджет кодексінің 67-бабы 6-тармағының 1-1) тармақшасына сәйкес әзірленді және балық шаруашылығы саласындағы бюджеттік субсидиялардың экономикалық әсерін айқындау тәртібін айқындайды.

2. Осы Қағидаларда мынадай негізгі ұғымдар пайдаланылады:

1) балық шаруашылығы – балық ресурстарын және басқа да су жануарларын қорғаумен, өсімін молайтумен, акваөсірумен, балық өсірумен, балық аулаумен, сондай-ақ қайта өңдеумен және өткізумен байланысты шаруашылық қызмет түрі;

2) балық шаруашылығы субъектісі – қызметінің негізгі бағыты балық шаруашылығын жүргізу болып табылатын жеке және заңды тұлға;

3) жануарлар дүниесiн қорғау, өсiмiн молайту және пайдалану саласындағы уәкiлеттi мемлекеттік орган (бұдан әрі - уәкiлеттi орган) – жануарлар дүниесiн қорғау, өсiмiн молайту және пайдалану саласындағы басшылықты, сондай-ақ өз өкілеттіктері шегінде салааралық үйлестіруді жүзеге асыратын орталық атқарушы орган.

2-тарау. Бюджеттік субсидиялардың экономикалық әсерін айқындау тәртібі

3. Балық шаруашылығы саласындағы бюджеттік субсидиялардан экономикалық әсерді айқындауды жыл сайын, есепті жылдан кейінгі жылдың 25 ақпаннан кешіктірмей, уәкілетті орган және облыстардың, Нұр-Сұлтан, Алматы және Шымкент қалаларының жергілікті атқарушы органдары жүргізеді.

4. Уәкілетті орган:

1) ресми көздерден алған деректердің мониторингін, талдауды және салыстыруды жүзеге асырады;

2) балық шаруашылығы саласындағы бюджеттік субсидиялардың экономикалық тиімділігін айқындайды;

3) балық шаруашылығы саласындағы бюджеттік субсидиялардың әрбір бағыты бойынша экономикалық әсерді айқындау нәтижелері туралы қорытынды дайындайды.

5. Бюджеттік субсидиялардың экономикалық әсері мынадай бюджеттік субсидиялар бойынша тиімділік коэффициентіне сәйкес айқындалады: инвестициялық салымдар кезінде балық шаруашылығы субъектісі шеккен шығыстардың бір бөлігін өтеу бойынша субсидиялау; акваөсіру (балық өсіру) өнімінің өнімділігі мен сапасын арттыруға, сондай-ақ асыл тұқымды балық өсіруді дамытуға субсидиялау.

6. Егер тиімділік коэффициенті «Балық шаруашылығы субъектілерін инвестициялық субсидиялау бағдарламасы шеңберінде тартылған инвестициялар көлемі» көрсеткіші бойынша тең болса (=1) немесе асып кетсе (>1), инвестициялық салымдар кезінде балық шаруашылығы субъектісі шеккен шығыстардың бір бөлігін өтеу бойынша субсидиялау тиімді деп танылады, ол мынадай формула бойынша есептеледі: Консультативтік тиімді түрі (бұдан әрі – К тиімді) = Негізгі капитал инвистиция көлемі (бұдан әрі – НКИК) ағымдағы жыл/ НКИК өткен жыл, мұнда: К тиімді – тиімділік коэффициенті; НКИК ағымдағы жыл – ағымдағы кезеңде балық шаруашылығы субъектілерін инвестициялық субсидиялау бағдарламасы шеңберінде тартылған инвестициялар көлемі; НКИК өткен жыл – өткен кезеңде балық шаруашылығы субъектілерін инвестициялық субсидиялау бағдарламасы шеңберінде тартылған инвестициялар көлемі.

7. Егер тиімділік коэффициенті «Өсірілген балық көлемі» көрсеткіші бойынша тең болса (=1) немесе асып кетсе (>1), акваөсіру (балық өсіру) өнімінің өнімділігі мен сапасын арттыруға, сондай-ақ асыл тұқымды балық өсіруді дамытуға субсидиялау тиімді деп танылады. «Өсірілген балық көлемі» көрсеткіші бойынша тиімділік коэффициенті мынадай формула бойынша есептеледі: К тиімді = Балық өсіру көлемі ӨБК ағымдағы жыл / ӨБК өткен жыл, мұнда: К тиімді – тиімділік коэффициенті; ӨБК ағымдағы жыл – ағымдағы кезеңде өсірілген балық көлемі; ӨБК өткен жыл – өткен кезеңде өсірілген балық көлемі.

8. Бюджеттік субсидиялардың экономикалық әсері егер тиімділік коэффициенті (<1) төмен болса теріс және егер тиімділік коэффициенті (=1) тең болса немесе (>1) асатын болса оң болып табылады. Егер тиімділік коэффициенті (<1) төмен болған жағдайда, уәкілетті орган жергілікті атқарушы органдардың деректері негізінде растайтын құжаттармен бірге (балықтың қырылуы, балықтың ауруы, судың ластануы, су айдынының гидрологиялық режимінің нашарлауы, ветеринариялық/фитосанитариялық жағдайдың қолайсыздығы туралы мәліметтер, балық шаруашылығын субсидиялауға жергілікті бюджеттен қаражаттың жеткілікті бөлінбейтіндігі туралы растау) есепті кезеңде өсірілген балық көлемінің төмендеу себептерінің негіздемелерін Қазақстан Республикасы Қаржы министрлігіне жібереді.