Об утверждении Правил, определяющих порядок и стоимость оказания консультационных услуг в области проектирования Қолданыста

Жобалау саласында консультациялық қызметтер көрсетудің тәртібі мен құнын айқындайтын қағидаларды бекіту туралы Қазақстан Республикасы Құрылыс Кодексі 24-бабының 37) тармақшасына сәйкес, БҰЙЫРАМЫН:

1. Қоса беріліп отырған жобалау саласында консультациялық қызметтер көрсетудің тәртібі мен құнын айқындайтын қағидалар (бұдан әрі - Қағидалар) бекітілсін.

2. Қазақстан Республикасы Өнеркәсіп және құрылыс министрлігінің Құрылыс және тұрғын үй-коммуналдық шаруашылық істері комитеті заңнамада белгіленген тәртіппен:

1) осы бұйрықты Қазақстан Республикасының Әділет министрлігінде мемлекеттік тіркеуді;

2) осы бұйрықты ресми жарияланғаннан кейін Қазақстан Республикасы Өнеркәсіп және құрылыс министрлігінің интернет-ресурсында орналастыруды қамтамасыз етсін.

3. Осы бұйрықтың орындалуын бақылау жетекшілік ететін Қазақстан Республикасының Өнеркәсіп және құрылыс вице-министріне жүктелсін.

4. Осы бұйрық 2026 жылғы 1 шілдеден бастап қолданысқа енгізіледі және ресми жариялануға тиіс.

5. Қағидалардың 23-тармағының 2) тармақшасы 2028 жылғы 1 шілдеден бастап мынадай редакцияда қолданылады деп белгіленсін: «2) сертификатты көрсете отырып, бөлімнің (бөлімдердің) атауы, мемлекеттік сараптама ұйымы немесе сараптама ұйымы қызметкерінің (қызметкерлерінің) – сарапшының (-лардың) тегі, аты, әкесінің аты (ол болған кезде);». «КЕЛІСІЛДІ» Қазақстан Республикасы Бәсекелестікті қорғау және дамыту агенттігі «КЕЛІСІЛДІ» Қазақстан Республикасының Ұлттық экономика министрлігі «КЕЛІСІЛДІ» Қазақстан Республикасының Қаржы министрлігі «КЕЛІСІЛДІ» Қазақстан Республикасының Жасанды интеллект және цифрлық даму министрлігі

Қазақстан Республикасының Өнеркәсіп және құрылыс министрінің 2026 жылғы 29 мамырдағы № 264 Бұйрыққа 1-қосымша Жобалау саласында консультациялық қызметтер көрсетудің тәртібі мен құнын айқындайтын қағидалар

1-тарау. Жалпы ережелер

1. Осы Жобалау саласында консультациялық қызметтер көрсету тәртібі мен құнын айқындайтын Қағидалар (бұдан әрі - Қағидалар) Қазақстан Республикасы Құрылыс кодексі (бұдан әрі - Кодекс) 24-бабының 37) тармақшасына сәйкес әзірленді және құрылыс жобаларын әзірлеу кезінде жобалау саласында консультациялық қызметтер көрсету (бұдан әрі - Консультациялық қызметтер) тәртібі мен құнын айқындайды және олардың сапасын арттыруға, сондай-ақ жобалау процестерін оңтайландыруға арналған.

2. Осы қағидалар жобалау саласында консультациялық қызметтер көрсетуді регламенттейді:

1) мемлекеттік сараптама ұйымы үшін - Кодекстің 104-бабында көзделген мемлекеттік монополияға жататын құрылыс жобалары бойынша;

2) сараптама ұйымы үшін - Кодекстің 109-бабының 1-тармағында көзделген құрылыс жобалары бойынша.

3. Консультациялық қызметтерді құрылыс жобасын ведомстводан тыс кешенді сараптамаға ұсынғанға дейін құрылыс жобасына тапсырыс берушінің немесе құрылыс жобасын әзірлеген жобалау ұйымының шешімі бойынша мемлекеттік сараптама ұйымы немесе сараптама ұйымы көрсетеді.

4. Қағидаларда мынадай терминдер мен ұғымдар пайдаланылады:

1) консультациялық қызметтер - мемлекеттік сараптама ұйымы немесе сараптама ұйымы көрсететін құрылыс объектісін жобалау кезінде ұсынымдар беру жөніндегі қызметтер;

2) консультациялық қызметтерді орындаушы (бұдан әрі - орындаушы) - құрылыс жобаларына ведомстводан тыс кешенді сараптаманы жүзеге асыратын мемлекеттік сараптама ұйымы немесе сараптама ұйымы;

3) консультациялық қызметтерге тапсырыс беруші - құрылыс жобасының немесе бөлімнің (бөлімдердің) тапсырыс берушісі (тапсырыс беруші-инвестор, тапсырыс беруші-меншік иесі) немесе жобалау ұйымы болып табылатын жеке немесе заңды тұлға.

2-тарау. Жобалау саласында консультациялық қызметтер көрсетудің тәртібі мен құны

1-параграф. Консультациялық қызметтер көрсетуге өтінімдерді ұсыну және қабылдау

5. Мемлекеттік сараптама ұйымының консультациялық қызметтер көрсетуі «бір терезе» қағидаты бойынша жобаларды әзірлеу мен сараптауды ұйымдастыру үшін портал (бұдан әрі - портал) арқылы немесе қағаз нұсқасында іске асырылады. Сараптама ұйымының консультациялық қызметтер көрсетуі порталмен интеграцияланған мемлекеттік емес цифрлық жүйе арқылы немесе қағаз нұсқасында іске асырылады. Қағаз нұсқасындағы құрылыс жобасын немесе құрылыс жобасының бөлімін (бөлімдерін) консультациялық қызметтерге тапсырыс беруші мынадай тәртіппен ұсынады: өтінім беру – қағаз нұсқасында; құрылыс жобасын немесе құрылыс жобасының бөлімін (бөлімдерін) бастапқы материалдармен және құжаттамалармен бірге - электрондық нұсқасында ұсыну.

6. Консультациялық қызметтер көрсету үшін консультациялық қызметтерге тапсырыс беруші портал арқылы немесе қағаз нұсқасында орындаушыға осы Қағидаларға 1-қосымшаға сәйкес нысан бойынша жасалатын консультациялық қызметтер көрсетуге арналған тапсырманың жобасымен бірге өтінім жібереді.

7. Өтінімді тіркегеннен кейін орындаушы өтінім түскеннен кейінгі келесі жұмыс күнінен бастап 5 (бес) жұмыс күні ішінде консультациялық қызметтер көрсетуге арналған тапсырманы қарауды жүзеге асырады. Осы тармақта көрсетілген мерзім өткеннен кейін орындаушы консультациялық қызметтерге тапсырыс берушіге келісу үшін консультациялық қызметтер көрсетуге арналған түзетілген тапсырманы жібереді.

8. Консультациялық қызметтерге тапсырыс беруші консультациялық қызметтерді жүзеге асыру үшін консультациялық қызметтерді көрсетуге арналған келісілген тапсырмада көзделген бастапқы материалдар мен құжаттамалар жиынтығын ұсынады.

9. Ұсынылған бастапқы материалдар мен құжаттамада құрылыс жобасының консультациялық бөлімі (бөлімдері) бойынша жобалық шешімдер мен есептеулер қамтылады. Консультациялық қызметтерге тапсырыс беруші консультациялық қызметтер көрсету үшін анық бастапқы материалдар мен құжаттамаларды ұсынуды қамтамасыз етеді.

10. Орындаушы бастапқы материалдар мен құжаттар келіп түскен күннен бастап 2 (екі) жұмыс күні ішінде олардың толықтығын тексереді. Олар толық болған жағдайда, консультациялық қызметтерге тапсырыс берушіге құрылыс жобасын әзірлеуге ұсынылған бастапқы материалдар мен құжаттамаларының жиынтықтылығын растайды. Консультациялық қызметтер көрсетуге арналған келісілген тапсырмада көзделген бастапқы материалдар мен құжаттамаларының толық емес пакеті ұсынылған кезде, құжаттар жетіспейтін материалдарды және (қажет болған жағдайда) жобалық шешімдер көрсетіле отырып, қараусыз қайтарылады. Құжаттарды қараусыз қайтару анықталған кемшіліктер жойылғаннан кейін тапсырыс берушінің консультациялық қызметтер көрсетуге қайта жүгінуіне кедергі келтірмейді.

11. Консультациялық қызметтердің ұзақтығы қаралатын жобалық шешімдердің, есептердің күрделілігі мен көлеміне, сондай-ақ ұсынымдарды талап ететін мәселелерге байланысты болады. Консультациялық қызметтер көрсетудің жалпы ұзақтығы 30 (отыз) жұмыс күнінен аспайды.

12. Мемлекеттік сараптама ұйымы көрсететін консультациялық қызметтердің құны осы Қағидаларға 2-қосымшада келтірілген формулаға сәйкес есептеледі. Сараптама ұйымдары көрсететін консультациялық қызметтердің құны осы Қағидаларға 2-қосымшада келтірілген формулаға және (немесе) консультациялық қызметтер көрсетуге арналған шартқа сәйкес есептеледі.

13. Консультациялық қызметтерге арналған шығындар құрылыс құнының жиынтық сметалық есебінің құрамына енгізілмейді.

14. Орындаушы мен консультациялық қызметтерге тапсырыс берушімен келісілген консультациялық қызметтер көрсетуге арналған тапсырма, ұсынылған бастапқы материалдар мен құжаттаманың жиынтығын растау консультациялық қызметтер көрсетуге шарт жасасу үшін негіз болып табылады.

2-параграф. Консультациялық қызметтер көрсетуге шарттар жасасу

15. Консультациялық қызметтер шарттың ажырамас бөлігі болып табылатын консультациялық қызметтер көрсетуге арналған тапсырмаға сәйкес орындаушы мен консультациялық қызметтерге тапсырыс беруші арасында жасалатын шарттар негізінде жүзеге асырылады.

16. Консультациялық қызметтер көрсетуге арналған шарт мыналарды қамтиды:

1) жасалатын шарттың мәні;

2) консультациялық қызметтер көрсету мерзімдері;

3) шартты мерзімінен бұрын бұзу туралы талаптар;

4) шартта көзделген мiндеттемелердi орындамағаны немесе тиiсiнше орындамағаны үшiн тараптардың жауапкершiлiгi. Шарт жобасына оған қол қойылғанға дейiн екi жақты келiсiм бойынша Қазақстан Республикасының заңдарына қайшы келмейтiн өзге де шарттар енгiзiлуi мүмкiн.

17. Консультациялық қызметтерге тапсырыс беруші орындаушы ресімдеген шарт жобасын алған күннен бастап 5 (бес) жұмыс күні ішінде оған қол қояды. Көрсетілген мерзім өткеннен кейін консультациялық қызметтерге тапсырыс берушіден қол қойған шартты алмаған кезде, орындаушы шарттың жобасын кері қайтарып алады.

18. Консультациялық қызметтер көрсетудің басталу күні оған тараптардың қол қойған күні болып табылады.

3-параграф. Консультациялық қызметтер көрсету кезіндегі рәсімдер

19. Құрылыс жобасының бөлімін (бөлімдерін) қарау кезінде консультациялық қызметтерді тікелей орындау үшін мемлекеттік сараптама ұйымының немесе сараптама ұйымының штаттық қызметкері (қызметкерлері) тағайындалады.

20. Бірегей құрылыс объектілері, сондай-ақ өзге де объектілер үшін жобалық шешімдер және/немесе есептеулер бойынша консультациялық қызметтер көрсетілген жағдайда, ерекше, бір бағытта мамандандырылған білім мен тәжірибенің болуын талап ететін инновациялық материалдарды, бұйымдарды, жабдықтар мен технологияларды қолдану бөлігінде, сараптама ұйымы немесе мемлекеттік сараптама ұйымы мамандарды және (немесе) мамандандырылған ұйымдарды шарттық негізде тартады.

21. Консультациялық қызметтер көрсету барысында мынадай рәсімдер орындалады: консультациялық қызметтер көрсетуге арналған тапсырмаға сәйкес ұсынылған бастапқы материалдар мен құжаттама зерделенеді, құрылыс объектісін жобалау кезінде ұсынымдар беріледі; консультациялық қызметтер көрсетуге арналған тапсырмада белгіленген кеңестер өткізіледі, олардың барысында консультациялық қызметтерге тапсырыс берушіге әзірленетін жобалық шешімдер және (немесе) есептеулер бойынша ұсынымдар беріледі; кеңестердің қорытындылары бойынша кеңестердің қорытынды нәтижелерін қамтитын хаттамалар жасалады.

4-параграф. Консультациялық қызметтер көрсету туралы есеп

22. Консультациялық қызметтер көрсету нәтижелері бойынша орындаушы консультациялық қызметтерге тапсырыс берушіге осы Параграфқа сәйкес консультациялық қызметтер көрсету нәтижелерімен есеп береді.

23. Консультациялық қызметтер көрсету туралы есептің (бұдан әрі - Есеп) мазмұны мыналарды көздейді:

1) негізгі деректерді көрсетуді (консультациялық қызметтерге тапсырыс берушінің атауы, бастапқы материалдар мен құжаттаманың тізбесі);

2) сертификатты (аттестатты) көрсете отырып, бөлімнің (бөлімдердің) атауы, мемлекеттік сараптама ұйымы немесе сараптама ұйымы қызметкерінің (қызметкерлерінің) – сарапшының (-лардың) тегі, аты, әкесінің аты (ол болған кезде);

3) консультациялық қызметтерді жүргізу барысы туралы ақпаратты;

4) консультациялық қызметтер көрсетуге арналған тапсырмада көрсетілген қойылған мәселелер бойынша қорытынды түсініктемелер, жауаптар-ұсынымдар.

24. Консультациялық қызметтер көрсету туралы есепке қосымшада консультациялық қызметтерге тапсырыс беруші мен орындаушы кеңестерінің ресімделген хаттамалары, сондай-ақ өзге де қажетті материалдар (Қазақстан Республикасының нормативтік құқықтық актілерінің ережелері немесе сілтемелері, қала құрылысы және техникалық регламенттердің, мемлекеттік мемлекетаралық нормативтік құжаттардың нормалары мен ережелерінің талаптары) орналастырылады.

25. Мемлекеттік сараптама ұйымының немесе сараптама ұйымының консультациялық қызметтер көрсету туралы есептері электрондық нысанда немесе қағаз жеткізгіште беріледі және қолтаңбалармен куәландырылады:

1) басшының немесе ол уәкілеттік берген тұлғаның;

2) консультациялық қызметтер көрсетілетін құрылыс жобасының тиісті бөлімдері (бөліктері) бойынша сарапшы (-лар) және (немесе) маман (-дар).

26. Мемлекеттік сараптама ұйымы және сараптама ұйымдары консультациялық қызметтерге тапсырыс берушілерге берілген консультациялық қызметтер көрсету туралы есептердің есебін жүргізеді.

27. Консультациялық қызметтер көрсету туралы есеп құрылыс жобасы бөлімінің (бөлімдерінің) немесе құрылыс жобасының нормативтік талаптарға сәйкестігі туралы сараптамалық қорытындыны алмастырмайды және оның салдары құрылыс жобасына ведомстводан тыс кешенді сараптама жүргізуді талап етеді.

28. Консультациялық қызметтер көрсету туралы есеп ұсынымдық сипатта болады және міндетті заңдық күші болмайды.

29. Консультациялық қызметтер көрсету туралы есеппен келіспеген кезде консультациялық қызметтерге тапсырыс беруші консультациялық қызметтер көрсеткен мемлекеттік сараптама ұйымы немесе сараптама ұйымы басшысының атына шағым береді. Шағым түскен күннен бастап 15 (он бес) жұмыс күні ішінде қаралады. Шағымды қарау нәтижелері бойынша мемлекеттік сараптама ұйымы немесе сараптама ұйымы мынадай шешімдердің бірін қабылдайды:

1) бұрын берілген есепке өзгерістер енгізу туралы;

2) шағымды қанағаттандырудан дәлелді бас тартуды жіберу туралы. Шағымды қарау нәтижелерімен келіспеген жағдайда, консультациялық қызметтер көрсету туралы есеп сот тәртібімен шағымдануға жатады.

Жобалау саласында консультациялық қызметтер көрсетудің тәртібі мен құнын айқындайтын қағидаларға 1-қосымша (тапсырма нысаны) Консультациялық қызметтер көрсетуге арналған № _______ тапсырма ____________ қаласы 202 ___ жылғы «____» ______________ Бұдан әрі «Тапсырыс беруші» деп аталатын _________________________, бір жағынан _________________________ негізінде әрекет ететін _________________________ және бұдан әрі «Орындаушы» деп аталатын _________________________, екінші жағынан _________________________ негізінде әрекет ететін _________________________ тұлғасында бұдан әрі бірлесіп «Тараптар» деп аталатын осы Тапсырманы консультациялық қызметтер көрсетуге арналған шартқа 202 ___ жылғы «____» ______________ № _______ мынадай шарттарда келісті:

1. Құрылыс объектісінің атауы;

2. Консультациялық қызметтер көрсету үшін қажетті бастапқы материалдар мен құжаттамалардың тізбесі;

3. Консультациялық қызметтер алу қажет құрылыс жобасы бөлімдерінің (бөліктерінің) саны;

4. Консультациялық қызметтердің мазмұны, оның ішінде тапсырыс берушіден консультациялық қызметтер алу қажет мәселелер;

5. Орындаушы мен тапсырыс беруші кеңестерінің санын ескере отырып, консультациялық қызметтер көрсетудің ұзақтығы;

6. Осы № _____ тапсырма Тараптардың әрқайсысы үшін бір-бірден бірдей заңды күші бар мемлекеттік және орыс тілдерінде (әрбір дана) 2 данада жасалды және қол қойылды. Орындаушы: ______ «_________________» Мекен-жайы: ______________ БСН _____________________ ЖСК _____________________ БСК ______________________ Банк: _____________________ Тел. ______________________ Лауазымы ________________ _____________ М.О. Тапсырыс беруші: ______ «_________________» Мекен-жайы: ______________ БСН _____________________ ЖСК _____________________ БСК ______________________ Банк: _____________________ Тел. ______________________ Лауазымы ________________ _____________ М.О. Жобалау саласында консультациялық қызметтер көрсетудің тәртібі мен құнын айқындайтын қағидаларға 2-қосымша Жобалау саласындағы консультациялық қызметтердің құнын есептеу Мемлекеттік сараптама ұйымы көрсететін консультациялық қызметтердің құны мынадай формула бойынша белгіленеді: Қкқ = Ну × Қак мұндағы: Қкқ – консультациялық қызметтердің құны, ҚҚС-сыз теңге; Ну – мемлекеттік нормативтік құжаттарға сәйкес бекітілген жобалау-іздестіру жұмыстарының (ЖІЖ) құнына байланысты жобалау құжаттамасының бөлімін талдау және бағалауды қоса алғанда, құрылыс жобасына ведомстводан тыс кешенді сараптама жүргізу бойынша уақыт нормасы. Ну консультациялық қызмет көрсетілетін жобалау құжаттамасы бөлімінің нормативтік құнына байланысты айқындалады; Қак – айлық есептік көрсеткіштің өзгеру индексі арқылы ағымдағы жылға индекстей отырып, құрылыс жобаларының ведомстводан тыс кешенді сараптамасы бойынша монополиялық қызмет түрі негізінде Орындаушының бухгалтерлік есебінің деректері бойынша айқындалатын есепті жылдағы Орындаушы персоналының бір адам-күн жұмысының құны. Есепті жыл – шығындар нормативтерін айқындау күнінің алдындағы соңғы толық күнтізбелік жыл.