Об утверждении Правил использования средств резервного фонда Күшін жойған

Резервтік қор қаржысын пайдалану Ережесін бекіту туралы 📌 Ескерту. Күші жойылды - Алматы қаласы Әкімшілігінің 09.03.2005 N 1/129 қаулысымен. "Қазақстан Республикасы Үкіметінің резервтегі қаржыны пайдалану Ережесін бекіту туралы" Қазақстан Республикасы Үкіметінің 1999 жылғы 18 қыркүйектегі N 1408 Қаулысын жүзеге асыру және қала Әкімінің резервтік қор қаржысын орнымен жұмсау мақсатымен қала Әкімі ШЕШІМ ҚАБЫЛДАДЫ :

1. Қала Әкімінің резервтік қорын пайдалану жөнінде ұсынылып отырған Ереже бекітілсін.

2. Қала Әкімінің "Резервтік қор қаржысын пайдалану Тәртібін бекіту туралы" 1998 жылғы 10 ақпандағы N 111 шешімі өз күшін жойды деп танылсын.

3. Қаржы басқармасы Әкім аппаратының заң бөлімімен бірлесе отырып, қала Әкімінің бұрын қабылдаған шешімдері мен өкімдерінің осы шешіммен сәйкестендірілуі жөнінде ұсыныс енгізсін.

Қала Әкімінің 1999 жылғы 18 қазандағы N 978 шешімімен бекітілді Қала Әкімінің резервтік қорын пайдалану жөніндегі ЕРЕЖЕ Осы Ереже Алматы қаласы Әкімінің резервтік қоры қаржысын бөлу және пайдалану тәртібін айқындайды.

1. Жалпы ережелер

1. Осы Ережеде мынадай ұғымдар пайдаланылады: қала Әкімінің резервтік қоры - тиісті қаржы жылында қала бюджетінде көзделген және бір жолғы сипаттағы тұтқиылдан болған шығындарды қаржыландыру үшін қала Әкімінің шешімі мен өкімі бойынша бөлінетін қаражат; күтпеген шығындар - алдын ала болжау қиын болғандықтан ағымдағы қаржы жылында қала бюджетін қалыптастыру кезінде жоспарлауға мүмкін болмаған және ағымдағы қаржы жылында кідіріссіз қаржыландыруды қажет ететін шығындар; қала Әкімі мен жергілікті атқарушы органдардың міндеттемелерін өтеу үшін қала Әкімінің резервтік қоры құрамындағы қаржы - қала Әкімінің резервтік қоры құрамында көзделген және сот шешімі бойынша қала Әкімі мен жергілікті атқарушы органдар міндеттемелерін өтеу үшін жергілікті бюджеттік бағдарламалар әкімшілеріне бөлінетін қаржы; қала Әкімінің резервтік қоры қаржысын алушы - жергілікті бюджеттік бағдарламалар әкімшісі немесе қала ауданының әкімі.

2. Қала Әкімінің резервтік қоры қаржысы есебінен қаржыландырылатын бір жолғы сипаттағы күтпеген шығындарға мына шаралар жатады:

1) табиғи және техногендік сипаттағы төтенше жағдайларды жоюға енетіндер: - төтенше жағдайлар салдарынан зардап шеккендерге материалдық көмек көрсету; - уақытша тұру пункттерін құру және ұстау мен зардап шеккендерді тамақтандыру; - төтенше жағдайдағы апаттан құтқару және қалпына келтіру бөлімшелерін техникалық құтқару құралдарымен, жабдықтармен қосымша жарақтандыру; - төтенше жағдайлар аумағында тасымал күштерімен және жабдықтармен қамтамасыз ету.

2) сот шешімі бойынша қала Әкімінің, жергілікті атқарушы органдардың міндеттемелерін өтеу. Қала Әкімінің резервтік қоры қаржысы басқа шығындарды қаржыландыруға бөлінбейді.

2. Қала Әкімінің резервтік қоры қаржысын өтеу және пайдалану тәртібі

3. Қала Әкімінің резервтік қорынан қаржы бөлуді заңмен белгіленген тәртіпте жүргізілген қаржыландыруды ашу жолымен тиісті қаржы жылында осы мақсатқа жергілікті бюджет шығысы құрамында бекітілген мөлшер шегінде, қала Әкімінің шешімі немесе өкімі негізінде Қаржы басқармасы жүзеге асырады, онда алушы, бөлінетін қаржы көлемі мен оны пайдалану мақсаты, сондай-ақ қайтарым негізінде қаржы бөлінген жағдайда оны беру және мерзімінде қайтару шарты көрсетіледі.

4. Қала Әкімінің резервтік қоры қаржысы қатаң түрде мақсатты іске жұмсалады және осы Ереже мен қала Әкімінің резервтік қор қаржысынан бөлу туралы шешімі немесе өкімінде көзделген қажеттілікке пайдаланылуы тиіс.

5. Қала Әкімінің резервтік қорынан қаржы бөлу туралы қала Әкімінің шешімі немесе өкімін әзірлеу кезінде мына жағдайлар ескеріледі: - ағымдағы қаржы жылында жергілікті бюджетте қаржыландырудың болмауы; - ағымдағы қаржы жылында қала Әкімінің резервтік қоры қаржысының қажеттілігі туындауы және оған деген сұраным сот шешімі бойынша қала Әкімі мен жергілікті атқарушы органдардың міндеттемелерін өтеу жағдайларынан өзге, алушының бұрынғы міндеттемесімен байланысты еместігі.

6. Қала Әкімінің резервтік қорынан қаржы бөлу туралы қала Әкімінің шешімі немесе өкімі жыл аяғына дейінгі тиісті шешімі мен өкімінің негізінде күшін жояды.

3. Табиғи және техногендік сипаттағы төтенше жағдайларды жоюға қаржы бөлу

7. Төтенше жағдайлар жөніндегі басқарма табиғи және техногендік сипаттағы төтенше жағдайлар туындағанда қала Әкімінің резервтік қорынан қаржы бөлу туралы өтініш береді. Бұл орайда қала Әкімінің резервтік қоры қаржысы есебінен жергілікті масштабтағы төтенше жағдайларды жою жұмыстары жүргізіледі.

8. Негізделген материалдар беру тәртібін және олардың тізбесін төтенше жағдайлар жөніндегі басқарма айқындайды.

9. Жергілікті масштабта табиғи және техногендік сипаттағы төтенше жағдайларды жою қажеттілігі туа қалған жағдайда Төтенше жағдайлар жөніндегі басқарма заңмен белгіленген тәртіпте қала Әкімінің атына төтенше жағдайларды жоюға қаржы бөлу туралы шешім немесе өкім жобасын ұсынады.

4. Сот шешімі бойынша қала Әкімі мен жергілікті атқарушы органдардың міндеттемелерін өтеуге қаржы бөлу

10. Сот шешімі бойынша қала Әкімі мен жергілікті атқарушы органдардың міндеттемелерін өтеу соттың істі орындату жөніндегі құжаттары болған жағдайда қала Әкімінің резервтік қоры қаржысы есебінен қамтамасыз етіледі.

11. Қала Әкімінің міндеттемесін өтеуге қала Әкімінің резервтік қорынан қаржы бөлу туралы қала Әкімінің шешімі немесе өкімі жобасын заңмен белгіленген тәртіпте Қаржы басқармасы әзірлейді.

12. Жергілікті атқарушы органдардың міндеттемесін өтеуге қала Әкімінің резервтік қорынан қаржы бөлу туралы қала Әкімінің шешімі немесе өкімі жобасын заңмен белгіленген тәртіпте жергілікті атқарушы орган дайындайды.

5. Бақылау және есеп беру

13. Қала Әкімінің резервтік қорынан бөлінген қаржыны алушылар Қаржы басқармасы белгілеген тәртіп және мерзімде оның жұмсалуы, орындалған жұмыс көлемі мен құны жөнінде есеп тапсыруы тиіс.

14. Қаржы басқармасы қала Әкімінің резервтік қоры қаржысының жұмсалуы және тиісті кезеңде қалғаны туралы қала Әкімі аппаратына ай сайын ақпарат береді.

15. Алушы қала Әкімінің резервтік қорынан бөлінген қаржыны орнымен жұмсамағаны үшін Қазақстан Республикасының Заңында көзделген тәртіпте жауап береді.

16. Қала Әкімінің резервтік қоры қаржысының орнымен пайдаланылуына бақылау жасауды Қаржы басқармасы жүзеге асырады.