О неотложных мерах защиты населения от туберкулеза в области Күшін жойған

Облыста халықты туберкулез ауруынан қорғаудың кезек күттірмейтін шаралары туралы 📌 Ескерту. Күші жойылды - Батыс Қазақстан облысы әкімінің 09.03.2004 № 11 шешімімен. Халықтың туберкулезбен ауырып, өлім-жітімнің өсуіне байланысты және туберкулездің одан әрі таралуын болдырмау және жағдайды тұрақтандыру мақсатында ШЕШІМ ЕТЕМІН:

1. Облыстық қаржы басқармасы (Хамитов) 1998 жылға қабылданған бюджетке туберкулезге қарсы шараларды мақсатты қаржыландыруды қамтамасыз етсін.

2. Мемлекеттік қаржы бақылау басқармасы (Еркінғалиев) облыста туберкулезге қарсы күресетін мекемелерге бөлінген қаржының өз мақсатында жұмсалуын тексерсін.

3. Облыстық экономика басқармасы (Жумағалиев) туберкулезге қарсы күрес жөніндегі шараларды жасап, оны 1998-2000 жылдары Батыс Қазақстан облысын дамытудың стратегиялық жоспарына артықшылық берілетін шара ретінде енгізсін.

4. Қала және аудандар әкімдері бір ай мерзімде коллегия мәжілістерінде туберкулезге қарсы күрестің жағдайы туралы мәселе қарап, туберкулездің одан әрі таралуын болдырмауды қамтамысыз ететін нақты шаралар алсын; ішкі істер органдарымен бірлесе отырып, туберкулез микробактериясын жұқтыратын ауруларды, маскүнемдіктен, есірткіден зардап шегушілерді және тексерілу мен емделуден жалтарушыларды ықтиярсыз емдейтін стационарлар аумағын күзетуді ұйымдастыру мәселелерін қарап, шешетін болсын.

5. Облыстық денсаулық сақтау басқармасы (Қадырбеков) туберкулезге қарсы ауруханалардың, санаториялардың, мектепке дейінгі балалар мекемелерінің жабылуына жол бермесін, туберкулезге қарсы мекемелерді жөндеуге көмектессін.

6. Батыс Қазақстан облыстық мал дәрігерлік комитеті (Имашев) мал фермаларының мал дәрігерлік-санитарлық жағдайын жақсартуға бағытталған және туберкулез жөнінде нашар шаруашылықтарды сауықтырудың кешенді шараларын жүргізуді ұйымдастырсын. Меншіктің түріне қарамастан, жеке және заңды тұлғалардан өнімдері белгіленген мал дәрігерлік-санитарлық талаптарға сәйкес өндірілуін және өткізілуін қамтамасыз етсін.

7. Батыс Қазақстан облыстық телерадиокомпаниясы (Сұлейманов), «Орал өнірі» (Қайырғалиев), «Приуралье» (Кульпин) газеттерінің редакциялары, қала және аудандар әкімдері, облыстық денсаулық сақтау басқармасы (Қадырбеков) туберкулезден сақтану және оның алдын-алу шаралары туралы халыққа түсіндіру жөнінде тұрақты айдар ашатын болсын. Түсінік жұмыстарын, әсіресе ауылдық жерлердегі тұрғындар арасында жүргізілуіне ерекше көңіл бөлінсін.

8. Бұл шешімнің орындалуын бақылау облыс әкімінің орынбасары В.К.Алексеевке жүктелсін.