Об утверждении Правил применения банка качества продукции Қолданыста

Өнім сапасы банкін қолдану қағидасын бекіту туралы «Магистральдық құбыр туралы» Қазақстан Республикасының 2012 жылғы 22 маусымдағы Заңының 6-бабы 12) тармақшасына сәйкес БҰЙЫРАМЫН:

1. Қоса беріліп отырған Өнім сапасы банкін қолдану қағидасы бекітілсін.

2. Қазақстан Республикасы Мұнай және газ министрлігінің Мұнай өнеркәсібін дамыту департаменті (Қ.С. Құлмырзин):

1) осы бұйрықтың Қазақстан Республикасы Әділет министрлігінде мемлекеттік тіркелуін;

2) осы бұйрық Қазақстан Республикасы Әділет министрлігінде мемлекеттік тіркелгеннен кейін оның ресми жариялануын;

3) осы бұйрықтың Қазақстан Республикасы Мұнай және газ министрлігінің ресми интернет-ресурсында жариялануын қамтамасыз етсін.

3. Осы бұйрықтың орындалуын бақылау жетекшілік ететін Қазақстан Республикасы Мұнай және газ вице-министріне жүктелсін.

4. Осы бұйрық оның алғашқы жарияланған күнінен кейін күнтізбелік он күн өткен соң қолданысқа енгізіледі. КЕЛІСІЛДІ Қазақстан Республикасының Қаржы министрі ______________ Б. Жәмішев 2012 жылғы 30 тамыз

Қазақстан Республикасы Мұнай және газ министрінің 2012 жылғы 21 тамыздағы № 140 бұйрығымен бекітілді Өнім сапасы банкін қолдану ҚАҒИДАСЫ

1. Жалпы ережелер

1. Осы Өнім сапасы банкін қолдану қағидасы (бұдан әрі – Қағида) «Магистральдық құбыр туралы» Қазақстан Республикасының 2012 жылғы 22 маусымдағы Заңына сәйкес әзірленді және магистральдық мұнай құбырымен өнім тасымалдау қызметтерін көрсету кезінде өнім сапасы банкін қолдану тәртібін айқындайды.

2. Осы Қағидада мынадай негізгі ұғымдар пайдаланылады:

1) алушы – өнімді тасымалдау жөнінде қызметтерді ұсынуға арналған шарттың талаптарына сәйкес өнім қабылдауды жүзеге асыратын тұлға;

2) жөнелтуші – өнім өндіруші болып табылатын тұлға немесе оны заңды негізде сатып алған тұлға не олар уәкілеттік берген, өнімді тасымалдау жөніндегі қызметтерді ұсынуға арналған шарт негізінде магистральдық мұнай құбырымен тасымалдау үшін өнімді ұсынатын тұлға;

3) магистральдық мұнай құбыры – өнімді қауіпсіз тасымалдауды қамтамасыз ететін, желілік бөліктен және объектілерден тұратын, техникалық регламенттер мен ұлттық стандарттар талаптарына сәйкес келетін бірыңғай өндірістік-технологиялық кешен;

4) магистральдық құбырдың меншік иесі – Қазақстан Республикасы, Қазақстан Республикасының әкімшілік-аумақтық бірлігі немесе магистральдық мұнай құбырына меншік құқығында иелік ететін заңды тұлға;

5) өнім – тасымалдауға дайындалған және мұнай бойынша техникалық регламенттерге сәйкес келетін мұнай;

6) өнімді тасымалдау – өнімді жөнелтушіден қабылдау пунктінен бастап алушыға тапсыру пунктіне дейін оны магистральдық мұнай құбыры арқылы қабылдау, тапсыру, айдау, өнімді басқа да магистральдық мұнай құбырларына қотару, құю, беру, басқа көлік түріне ауыстырып тиеу, сақтау, араластыру процесі;

7) өнім сапасы банкі – өнімнің сапасы мен саны жөніндегі деректер негізінде магистральдық мұнай құбырымен тасымалданатын өнім сапасының көрсеткіштеріндегі айырмашылықтарға байланысты жөнелтушілер арасында өтемақы және (немесе) төлем төлеу арқылы өзара ақшалай есеп айырысулар жүргізу тетігі.

2. Өнім сапасы банкін қолдану тәртібі

3. Өнім сапасы банкінің барлық қатысушылары арасында көпжақты шарт жасалғаннан кейін өнім сапасы банкісі енгізіледі, онда жөнелтушілер арасында өтемақы және (немесе) төлем төлеу арқылы ақшалай өзара есеп айырысулар тәртібі мен шарттарын айқындайтын ережелер көзделеді.

4. Егер көпжақты шарттың қолдану мерзімі ішінде жекелеген маршруттарда немесе мұнай құбыры учаскесінде магистральдық мұнай құбырымен өнім тасымалдауға қызметті жаңа жөнелтушілер талап етсе, бұндай қызмет көрсету осы жөнелтушілердің бұл шартқа қосылған жағдайда жүзеге асырылатын болады.

5. Өнім жөнелтушілер арасында өзара ақшалай есеп айырысу жүзеге асыратын тұлға өнім сапасы банкінің барлық қатысушыларымен белгіленеді. Өнім жөнелтушілер арасында өзара ақшалай есеп айырысулар жөнелтушілердің мүддесіне және олардың есебінен жүзеге асырылады. Өнім жөнелтушілер және өнім жөнелтушілер арасында өзара ақшалай есеп айырысуларды жүзеге асыратын тұлға арасындағы құқықтық қатынастар шарты негізінде реттеледі.

6. Өнім сапасы банкісі магистральдық мұнай құбырына кірісіндегі және/немесе құбырынан шығысындағы жекелеген өнім сапасы банктерінен тұруы мүмкін.

7. Өнім сапасы банкісі магистральдық мұнай құбыры жүйесінің қабылдау пунктінде қабылданған және/немесе тапсыру пунктінде тапсырылған жекелеген мұнай ағыны сапалық көрсеткіштерінің (тығыздығы, кг/текше м. және/немесе күкірт құрамы %) жалпы мұнай ағыны қоспасының сапасымен салыстырғандағы өзгерістеріне негізделеді.

8. Техникалық ұсыныстар беру, мұнай бойынша бағалық ақпаратқа тәуелсіз бағалау жүргізу, құн коэффициенттерін белгілеу мақсатында жөнелтушілердің мүддесі үшін және есебінен өнім сапасы банкісі бойынша техникалық консультант тартылуы мүмкін.

9. Өнім сапасы банкісі бойынша сомалар (төлем, өтемақы) есебі ресімделген қабылдау-тапсыру құжаттары – мұнайды қабылдау-тапсыру актісі, мұнайдың сапа паспорты негізінде жүргізіледі.

10. Өнім сапасы банкісі бойынша ақшалай есеп айырысу тетігі төлем және өтемақы сомаларының нөлдік балансын қамтамасыз етуге тиіс.