Қазақстан Республикасының 2001 жылғы 23 қаңтардағы «Қазақстан Республикасындағы жергілікті мемлекеттік басқару және өзін-өзі басқару туралы», 2016 жылғы 6 сәуірдегі «Құқықтық актілер туралы» Заңдарына сәйкес Батыс Қазақстан облысының әкімдігі ҚАУЛЫ ЕТЕДІ:

1. Батыс Қазақстан облысы әкімдігінің 2022 жылғы 8 шілдедегі № 133 «Батыс Қазақстан облысының мемлекеттік сәулет-құрылыс бақылауы басқармасы» мемлекеттік мекемесі туралы ережені бекіту туралы» қаулысымен бекітілген «Батыс Қазақстан облысының мемлекеттік сәулет-құрылыс бақылауы басқармасы» мемлекеттік мекемесі туралы ережесіне келесідей өзгерістер мен толықтырулар енгізілсін:
1) «Батыс Қазақстан облысының мемлекеттік сәулет-құрылыс бақылауы басқармасы» мемлекеттік мекемесі туралы ереженің 14-тармағының 2-тармақшасы мынадай міндеттермен толықтырылсын:
«сәулет, қала құрылысы және құрылыс істері жөніндегі уәкілетті орган айқындаған тәртіппен салынып жатырған (салынуы жоспарланған) құрылыс объектілері мен кешендеріне мониторинг жүргізу;»;
«құрылыс объектілерін пайдалануға қабылдау актілерін есепке алуды жүргізу, бұл ретте халықтың мобильділігі шектеулі топтарының қолжетімділігін қамтамасыз етуді міндетті түрде есепке алу;»;
«мемлекеттік сәулет-құрылыс бақылауын және қадағалауын жүзеге асыру және Қазақстан Республикасының Әкімшілік құқық бұзушылық туралы кодексінде белгіленген, құрылыс объектілеріндегі сәулет-қала құрылысы тәртібін бұзушыларға әкімшілік ден қою шараларын қолдану;»;
«Қазақстан Республикасының заңнамасын, мемлекеттік нормативтік құжаттарды, сәулет, қала құрылысы және құрылыс қызметі саласында белгіленген шарттар мен шектеулерді бұзғаны және олардан ауытқығаны үшін бұзушыларға қатысты Қазақстан Республикасының заңдарында көзделген шараларды қолдану туралы шешімдер қабылдау.».
2) 15-тармағы 1-тармақшасындағы «Қазақстан Республикасының Кәсіпкерлік кодексіне және «Қазақстан Республикасындағы сәулет, қала құрылысы және құрылыс қызметі туралы» Заңына сәйкес тексеру нысанында және өзге де нысандарда сәулет-құрылыс бақылауын және қадағалауды жүзеге асыру;» деген сөздер
«Қазақстан Республикасының Кәсіпкерлік кодексіне және Қазақстан Республикасындағы Құрылыс кодексіне сәйкес тексеру нысанында және өзге де нысандарда сәулет-құрылыс бақылауын және қадағалауды жүзеге асыру;» деген сөздермен ауыстырылсын;
3) 15-тармағы келесідей мазмұндағы 9-тармақшамен толықтырылсын:
«9) құрылыс объектілерін пайдалануға қабылдау сатысына қатысу.».
4) 18-тармағы келесідей мазмұндағы 12-тармақшамен толықтырылсын:
«12) Қазақстан Республикасының Әкімшілік құқық бұзушылық туралы кодексіне сәйкес әкімшілік құқық бұзушылық туралы істерді қарайды және әкімшілік жазалар қолданады.».